Уште десет нови телевизии од земјава ќе се емитуваат на сателит. Советот за радиодифузија донесе одлука со која им се одобрува сателитско емитување на програмата на десет од дванаесетте телевизии кои аплицирале за овој начин на емисија.
Седум од нив и тоа телевизиите на Бојо Андревски - Скопје, Ѓорѓи Атанасовски - Прилеп, Тинекс МТ - Скопје, Лукотрејд - Скопје, Наш концепт - Скопје, Нова ТБ - Скопје и К - 15 - Скопје, ќе емитуваат програма од општ формат, додека, пак, телевизиите Ера Компани - Скопје, Зајди, зајди - Скопје и Николина Спасова - Миравци, Гевгелија ќе емитуваат програма од специјализиран формат.
- Општ формат подразбира телевизијата да емитува повеќе видови на емисии кои претежно ќе се задржуваат на определен формат, додека оние од специјализиран формат ќе емитуваат исклучиво еден вид на програма, на пример музика, филмови, спорт, цртани филмови или друго - појасни Зоран Стефановски, Претседател на Совет за Радиодифузија.
Досегашната бројка на сателитеските телевизии од земјава беше 7 од кои 5 се со со општ, а две со специјализиран формат. Оваа бројка сега е зголемена на вкупно 17. Потребата за нови телевизии од Советот за Радиодифузија ја гледаат во отворената економија на пазарот на медиуми, како и тоа дека телевизиите се користатаво одбрана на националниот идентитет на земјава.
- Не може да им забраните на луѓето да инвестираат во телевизиски куќи. Моментално имаме огромна побарувачка за нови телевизии како од домашни така и од странски инвеститори. Македонските телевизии се со доволен капацитет да ги заменат странските сателитски телевизии кои доминираат на македонскиот пазар. На тој начин би излегле во пресрет на зачувување на македонскиот јазик - изјави Стефановски.
Следен чекор на Советот за радиодифузија е воведување на дигитална телевизија во земјава. Европската Унија со закон ги обврза своите членки до 2012 година да бидат целосно дигитализирани. Иако Македонија се уште не е членка, секако треба да го следи овој тренд.
Горан Маџаровски
Comments